Gweithdai Hygyrch
Os ydych am redeg gweithdai sydd â'r nod o gynnwys a rhoi mynediad i bawb, neu weithdai ar gyfer pobl anabl yn benodol, dewiswch arweinwyr eich gweithdai yn ofalus. Mae ymarferwyr gyda phrofiad o gynnal gweithdai sy'n rhoi mynediad i bobl anabl i'w cael ym mhob maes o'r celfyddydau. Bydd profiad yr ymarferwyr yn gwahaniaethu'n sylweddol, felly mae'n well cael argymhellion gan sefydliadau celfyddydol sydd wedi gwneud gwaith tebyg, neu gan sefydliadau i bobl anabl fyddai'n debygol o fod wedi bod yn rhan o brosiectau celfyddydol o'r blaen.
Mae mynediad yn ymwneud a chyfathrebu, goleuo, cynhesrwydd, acwstig a llefydd parcio yn ogystal â lloriau gwastad a thoiledau hygyrch. Gall ystafell gyda wal wydr a llawr disglair fod yn hunllef i bobl gyda nam ar eu golwg. Yn yr un modd, gall acwstig sy'n bownsio i bob cyfeiriad greu anawsterau i bobl sy'n defnyddio offer clywed a phobl sy'n sensitif i sŵn. Mae'n werth cymryd amser i wneud yn siŵr bod y sesiwn yn cael ei chynnal mewn lle hygyrch, ac y bydd pawb yn gallu cyfathrebu'n hawdd.
Pwyntiau gweithredu
Camau cynllunio
- Nodwch yn glir beth yw amcanion y gweithdai
- Nodwch grwpiau targed (os oes rhai)
- Gofynnwch am argymhellion gan sefydliadau celfyddydol eraill
- Gofynnwch am argymhellion gan sefydliadau i bobl anabl
Pan fydd arweinwyr y gweithdai wedi eu pennu
- Siaradwch â hwy am y math o fynediad cyffredinol y bydd y cyfranogwyr yn debygol o fod ei angen
- Gofynnwch a oes gan arweinydd y gweithdy anghenion mynediad penodol
- Gwiriwch fynediad y lleoliad gydag arweinydd y gweithdy
- Nodwch y newidiadau sydd angen eu gwneud cyn y gweithdy ee goleuo, cadeiriau, arwyddion dros dro
- Cynhyrchwch ddeunydd cyhoeddusrwydd hygyrch ac addas
Pan fydd pobl yn archebu lleoedd ar gyfer y gweithdai
- Rhowch fanylion syml am fynediad ee trafnidiaeth, parcio, mynediad i gadair olwyn
- Gofynnwch i'r cyfranogwyr a oes ganddynt anghenion mynediad penodol
- Os bydd rhywun yn gofyn am ddarpariaeth benodol yn ymwneud â mynediad, byddai'n well cadarnhau hynny gyda'r person cyn gwneud trefniadau
Wrth baratoi lleoliad y gweithdy
- Sicrhewch fod mannau parcio ar gyfer pobl anabl yn cael eu cadw'n glir
- Symudwch unrhyw berygl neu rwystr a all beri i rywun faglu
- Gwnewch yn siŵr bod arwyddion yn cael eu harddangos (maent yn hawdd i'w cynhyrchu ar eich cyfrifiadur)
- Addaswch oleuadau / gwres / cadeiriau
- Gosodwch yr ystafell fel bod pobl yn gallu gadael eu cotiau a'u bagiau'n hawdd
- Gwnewch yn siŵr bod lluniaeth yn hawdd i'w gyrraedd NEU sicrhewch fod staff ar gael i'w weini
Pan fydd pobl yn cyrraedd
- Os ydych wedi trefnu mynediad penodol ar gyfer unrhyw un, gofynnwch iddynt a yw popeth yn iawn
Tra bydd y prosiect yn mynd rhagddo
- Gwnewch yn siŵr eich bod ar gael i siarad â phobl ar ddechrau'r sesiwn neu ar ei diwedd
- Bydd y gallu i gyfathrebu'n hawdd yn annog pobl i roi gwybod i chi am unrhyw broblem gyda mynediad cyn iddi ddod yn broblem anorchfygol
Pan fydd y prosiect wedi dod i ben
- Gwnewch yn siŵr bod system adborth / gwerthuso ar gael sy'n hygyrch i bawb
- Nodwch fynediad fel pwnc ar y ffurflen adborth / gwerthuso
