Monitro a Gwerthuso
Monitro effeithiolrwydd y cynllun gweithredu
Yn aml ceir pryder ynghylch monitro nifer y bobl anabl sy'n rhan o brosiect, ac amharodrwydd i ofyn cwestiynau personol, ac mae hynny'n ddealladwy. Yn y rhan fwyaf o achosion ni ddylai fod angen gofyn am wybodaeth bersonol gan unigolion. Dyma rai ffyrdd o fonitro:
- Cofnodi nifer y ceisiadau am ddefnyddio cyfleusterau fel lleoedd parcio i'r anabl, gwasanaeth disgrifio clywedol, dolenni clywed, gwybodaeth ar fformat penodol, consesiynau i bobl anabl.
- Cofnodi cyfarfodydd / ymgynghoriadau rhwng eich sefydliad chi a sefydliadau pobl anabl neu unigolion anabl. Nodi pwyntiau gweithredu yn codi o'r cyfarfodydd.
- Dylai sefydliadau sy'n cynnal prosiectau sy'n cynnwys grwpiau o bobl anabl wybod faint o bobl sy'n mynychu.
- Mewn ffurflenni archebu ar gyfer cyrsiau neu weithdai dylid gofyn y cwestiwn 'A oes gennych unrhyw ofynion penodol o ran mynediad?' Cadwch gofnod o nifer y bobl sy'n gofyn am gyfleuster neu addasiadau penodol.
- Yn ystod gwerthusiadau blynyddol, dylid gofyn i staff fel mater o drefn a oes ganddynt unrhyw ofynion o ran mynediad, er mwyn sicrhau bod yr amgylchedd gwaith yn fwy hygyrch. Dylid gofyn yr un cwestiwn ynghylch anghenion mynediad i bob aelod o'r bwrdd, aelodau o grwpiau cynghori a gwirfoddolwyr.
- Os bydd cyfleuster penodol ar gael fel rhan o fenter datblygu cynulleidfaoedd, efallai y bydd hyn yn gyfle da i fesur faint o bobl sy'n ei ddefnyddio. E.e. Cyfleuster negeseuon testun ar gyfer archebu tocynnau ar gyfer digwyddiad celfyddydol i pobl Fyddar.
Gwerthuso
Dylai pob agwedd ar wasanaethau'r sefydliad sy'n cynnwys pobl anabl gynnwys gwerthusiad sy'n hygyrch i'r bobl sy'n ymateb.
Gofynnwch i bobl beth yw'r ffordd sydd orau ganddynt o gwblhau gwerthusiad; dylai cymaint o opsiynau â phosibl fod ar gael.
Ystyriwch: gamera fideo, recordydd tâp, ffurflen werthuso ar wefan, galwad ffôn, gwerthusiad ar lafar mewn grŵp, gwerthusiad ar lafar un i un.
Sicrhewch fod yr iaith ar y ffurflen werthuso yn briodol ac yn hawdd i'w deall. Ceisiwch osgoi unrhyw jargon diangen.
Pan fyddwch yn gwerthuso, gofynnwch a oedd y prosiect neu'r digwyddiad yn hygyrch, ac a oes gan yr ymatebydd unrhyw sylwadau ynghylch hygyrchedd.
